Í gjárkvøldið var slóðbrótandi foreldrafundur í bygdahúsinum. Tað var fyrstu ferð, at skúli, dagstovnur og kommuna í felagi skipaðu fyri foreldrafundi. Evnið var trivnaður. Tað er nevniliga soleiðis, at Sjóvar kommuna saman við skúla og dagstovni í eina tíð hava arbeitt við at finna eitt felags amboð til at arbeiða við trivnaði. Í samstarvi við Óla Rubeksen, SSP-ráðgeva og Tóru Petersen, trivnaðarráðgeva hjá Námi, eru stovnarnir farnir í gongd við at arbeiða við TÍTT (tiltøk í tøkum tíma), sum er eitt konkret arbeiðsamboð, sum byggir á systemiska fatan og hevur LP-frymilin sum grundarlag. Tvær ferðir um árið fylla starvsfólk á stovnunum eitt trivnaðarskjal út fyri hvør barnið, og so skjótt sum okkurt er, sum starvsfólk ella foreldur gerast varug við kann betrast, verður skipað fyri fundi millum stovn og foreldur. Gott foreldrasamstarv er týdningarmikið, tá arbeitt verður við TÍTT, og tí kann roknast við, at tað oftari verða fundir millum stovn og foreldur, enn tað hevur verið fyrr. 

Fundurin í gjárkvøldið var ógvuliga jaligur og nógv fólk møttu til fundin. Anja Clementsen greiddi frá um týdningin av góðum samstarvi millum øll tey, sum eru um barnið, fyri at barnið kann trívast og mennast, sum tað skal. Eisini greiddi hon frá TÍTT-arbeiðsháttinum. Aftaná ein góðan drekkamunn við lagkøku greiddu skúlastjórin og dagstovnaleiðarin frá, hvussu arbeitt verður við TÍTT í skúla og á stovni. Eisini høvdu skúlastýrið og foreldraráðið hvør sítt upplegg um tað, sum tey arbeiða við. Eitt sera gott kvøld, har foreldur vóru glað fyri tað, sum kommunan, skúli og dagstovur eru farin í gongd við.