Um skúlan

Fyrsti skúlin á Strondum varð bygdur í 1887.

Frammanundan var skúli hildin í sethúsunum hjá Niels oman fyri Hoygarð. Lærari var Johs. Petersen í Saltnesi.

Í 1876 verður lærari settur í Sjóvar sókn. Tað er Jógvan Poulsen, sum kemur at halda skúla á Strondum, Skála og Selatrað. Hann er lærari til 1917, tá kemur Jóhan Poulsen, og er hann einalærari til1933, tá Chr Høj verður settur annarlærari. Í 1958 fer Jóhan Poulsen frá, Chr Høj verður 1.lærari og Edmund í Garði 2.lærari.

Frá 1933 til 63 eru 4 flokkar á Strondum. Øll hesi árini er tímatalvan óbroytt, t.v.s. teir báðir lærararnir hava tær somu lærugreinarnar í teimum ávísu flokkunum. Í 1963 kemur ein flokkur aftrat og í 66 aftur ein.

Tá koma Ámundur Berthelsen og Hjalgrím Poulsen til skúlan. Selatraðarskúli verður niðurlagdur í 1969, tá skúlin verður bygdur á Strondum og Magnus Nielsen, einalærari, kemur út í Stranda skúla at arbeiða.

Í 1969 varð, sum sagt, nýggjur skúli tikin í brúk á Strondum, og hevur hann eisini framhaldsdeild.

Umframt næmingar úr Sjóvar kommunu, so koma eisini næmingar av Skála, Skálafirði, Oyndarfirði og Hellunum at ganga í skúlanum.

í 1984 varð vaksið um skúlan, so nú vóru munandi betri umstøður.

Í 2011 er skúlin aftur útbygdur, nú er ein nýtt læraraumhvørvið gjørt, og ein bygningur við 7 skúlastovum er bygdur úr suðurendanum frá fimleikarahøllini.

Deildir

Í Stranda skúla eru flokkarnir lagdir saman í deildir.  

Byrjanardeildin eru flokkarnir 1.-3. fl.

Miðdeildin eru flokkarnir 4.-6.fl.

Hádeildin er 7.-10. flokk. 

Umframt vanliga undirvísing er eisini tónleikaundirvísing í skúlanum.